Shetlan

Du may waander on fir ever An seek idder laands dee lane, Bit someday du'll come driftin Ta da laand o laands agen. Sho's a laand o faeries dancin In a ring o snaa-white scöm, Whaar da grit grey sea lies skulkin I'da dim, saft Simmer-höm Dere A'm pluckin Kokkiluries, An gadderin Paddick-stöls, Or guddlin tricky skeeticks I'da clear, saat-water pöls; A'm rickin peerie sillicks Wi a preen, an docken-waand, Or pokin eftir smislins I'da ebb-stanes i'da saand. Dere I look alang da tide-line, Among da tang an waar, Fir barrel-scows an battens, An bits o brokken spar; Fir da muckle seas is brakkin In stoor laek cloods o snaa, An der tales o vessels wrackin Wi dir sails aa blaan awa. Du may waander on fir ever An seek idder laands dee lane, Bit some day du'll come driftin Ta da laand o laands agen. Shö's a laand whaar Winter's souchin Trowe da spöndrift an da squaal. An da smorin moorie-caavie Fills da Nort wind's oobin waal.