Dajake

Bahtalo dive bajrami I phuri daj dengape godi Ko shuze purane dive Ked o chave sine khere Tari dzamija ka iranen Pe dakoro vas ka resen I daj pa re olen ka del Ki angali olen ka lel Ej tu dujna hovavnije Halali te ovel tuke Me chave mandar cidingjan Mi angali cuci mukljan Mi dusha andral thargjan Parencar len hovavgjan O bers achili korkori I soba lakiri cuci Adzikerela oj haberi Te zvoninel o telefoni Lengoro glaso te shunel Bajrami te bahtaren lake O chave lake but falinen I dujna latar chorgjalen O chave ko duripe A oj korkori khere Lakoro vas nikoj na resel O chave ola bisterge Pocminga te rovel phuri daj Lakoro glaso o arsi sunga Naleti o dinari te ovel Ked o chave tuja nane