فراق صالونات

راجع نفسه وهو بيقفل الببيون كان مندمج لحد قبل فرحكوا بيوم سأل سؤال لو سألتيه عمرك ما تضيعي أنا هنا لأني عايز ولا لإن ده الطبيعي خلص تعليم وكوّن نفسه وشعره أبيّض سنة أهله قالوا يا بني نفرح بيك خلاص كبرنا واختاروكي عشان جميلة وبنت ناس ومتعلمة قعدة الثانية إتشد ليكي وقام ملبس دبل عمره ما حس لحظة واحدة إنك بتكمليه الحكاية إنك ناسبتي شكل حياة لازم يبنيه كان بيطمن نفسه بإن الحب بيتولد بالعشرة وإن جوهر العلاقة توازن وإن العشق قشرة فاق وفكر في اللي جاي بمنطقية ملايين بمواصفاتها يبقى اش معنى هي؟ لو خسرت ميزة هفضل راضي بيها؟ لو شفت واحدة أحسن ليه ما تشدش ليها؟ إنت كمان من صُغرك ما ختارتيش حاجة بمزاجك سيبتيهم يخترعوكي بدل ما تسعي لإكتشافك قالوا لك كُليات القمة يا إما تبوظ حياتك وانت ما شاء الله دخلتي طب بإجتهادك وبقيتي في ركن خلى عدد إختياراتك قليل الدكتورة تتجوز دكتور يا مهندس بالميك وبقربك مـن الثلاثين إتزنقتي في ركن جديد قطر الجواز هيفوتك وانت لازم تلحقيه جه وكان باين فيه معظم شروطك في البداية مع الوقت ظهرت العيوب وغطت المزايا وفشلتي تغيريه فبدأتي تحاولي تقبليه مفيش رجوع خلاص بقالكوا سنة أهو مخطوبين مـن النقطة دي مكانش ولا هيكون بينكوا إلا كبت كان لازم طرف منكوا يرجع مهما كان الوقت وأهو دلوقتي أفضل من بعدين وانتوا لسه اثنين أحسن ما تاخذوا طفل في الرجلين وبكرة تقولي صدقت