Yal wa i yettnadi

YAL WA I YETTNADI Yal wa d acu yettnadi Di ddunit-a n wass-a Wa teqqaz deg-s tfidi Imeṭṭi-s yejreḥ tasa Yettraǧu kan yettɛenni Yerfed allen-is s igenni Yessutur yal ass deg Yillu Yessutur ad t-yesseḥlu Yal wa d acu yettnadi Yessaram yebɣa ad t-yelḥeqq Ixeddem yecrew tidi Tessemḥalleq-as-d mm-lḥeqq Yettraǧu tizi n ssbeḥ Ixeddem yettraǧu rrbeḥ Ziɣ-n lmut teggunit Tesɣam-as-id ddunit Yal wa d acu yettnadi Di ddunit-a yessewḥacen Wa d tament akked wudi Yettaččar deg yiqbucen Wa yettemdeggar d wussan Ɛerqen-as iberdan Yettazzal deg yiḍ, deg wass Akken i t-id-yufa useggas Yal wa d acu t-ixussen Wa d talwit, wa d idrimen Ttlummun deg yiseggasen Ddunit deg-s ttasmen Talwit mačči d idrimen Idrimen yerwin ixxamen Ssefraḥen, sseqraḥen Ttcemmiten, ttcebbiḥen Yal wa d acu i t-yewten Wa d zzher, wa d afus-is Wa yettwali i t-ifuten Wa yetthuddu di lsas-is Zzher d afus i t-ineǧǧren Anda ma ddan iḍarren Ma yella teɣliḍ kker Ur ttuɣal ara d ifekker Yal wa d acu yettnadi Wa d tayri, wa d berru Wa taɛzizt-is ar uberdi Yid-s yeḍsa ma tettru Tayri teslul-d berru Berru d tayri ad tt-yefru Ulawen yemsaḥmalen Ass-a d iɛdawen ay uɣalen Yal wa d acu yettnadi Wa d ccwal, wa d talwit Wa yedduri icuḍaḍ ibidi Wa yettnadi taɛdawit Talwit tettlal-d s ccwal Ccwal yettlal-d s wawal Yir awal yeqqaz ixenneq Yir tadyant tettcewwil tneqq IZIRAN Fahim MESƐUDEN